Вилоят ҳокими Ўмирзақ Шўкеев “Ғамхўрлик” дастури доирасида ёрдам кўрсатилган Тўлебий тумани, Зертас қишлоқ округидаги 8 болали хонадонга бориб, унинг ҳаёти билан танишди.

 Кўмакка муҳтож Қуат Ўралов бир этак болалари билан бир хонали уйда яшамоқда. Доимий иши бўлмаган оила давлат томонидан болалари учун бериладиган нафақага кун кечирмоқда. Дастур доирасида ёрдам беришни ният қилган маҳаллий тадбиркор уларнинг уйи томини янгилаб бермоқчи.

– Боқимандалик билан муҳтожликни ажрата олишимиз зарур. Болаларга давлат томонидан бериладиган ёрдам пули уларнинг ўзига сарфланиши керак. Энг катта бойлигимиз – еримиз! Томорқадан унумли фойдаланиб, фарзандларни меҳнатга ўргатиш керак. Ҳаммамиз қишлоқда ўсдик. Меҳнат одамни улуғлайди. Уй қурилишида ҳам болаларингиз ёрдамлашиши лозим, – деди вилоят ҳокими.

Умуман олганда, Тўлебий туманида турмуши ночор 86та оила аниқланган. Уларни оталиққа олишга ҳокимлар, депутатлар ва тадбиркорлар сафарбар этилади.