Ҳиндистоннинг пойтахти – Нью Дели шаҳридаги “AUTORS Press” нашриётида “Ўзбек адабиёти тўп­лами“ номи билан адабий тўплам чоп қилинди. Ундаги шеърий ва насрий асарларни Ўзбекистон давлат туризмини ривожлантириш қўмитаси Қашқадарё вилоят бўлими мутахассиси, “Фемида” газетасининг бош муҳаррири Асрор Оллоёров инглиз тилига ўгирган. Шунингдек, асарларни бенгал тилига ўгиришга мазкур нашриётнинг бош муҳаррири, таржимон, Уттар-Прадеш штатидаги Аллаҳобод университети доктори, профессор Вано Шаминоз ҳам катта ҳисса қўшди.

Тўплам ўзбекистонлик ижод­кор­­­­­­­­­ларнинг Ҳиндистонда чиққан бе­­­шинчи китобидир. Унга кирган 30 қаламкашнинг 26 нафари ўзбе­кис­тонлик, қолганлари ҳамюрт­лари­миздир.

Жумладан, китобда Қозоғистон Ёзувчилар уюшмаси аъзоси Сун­натилла Акромовнинг “Қабристонда яширилган ёмби”, Собир Шому­ро­довнинг “Сизга ўхшагим келади”, “Сўрама менинг аҳволим”, “Кулги маълумотномаси”, “Шу қиз рақс тушсин” шеърлари, тўлебийлик сати­рик Ералихан Жилқайдарулининг “Но­гирон қиз” ҳажвияси, таниқли жур­налист ва шоир Абдисаттар Алип­нинг “О, муҳаббат, муҳаббат!”, “Оқ­қушим менинг”, “Қизлар”, “Сариқ куз ва Сариқ қиз” каби шеърлари эълон қилинган. Уларни Баҳодир Оташ ўзбек тилига ўгирган. 

Яқин кунларда тўпламнинг тақ­димоти Шимкент, Тошкент, Чирчиқ шаҳарлари ҳамда Сариоғоч, Сайрам, Тўлебий, Келес туманларида ўтади.