Қасим-Жўмарт Тўқаев Ҳазрат-Султон масжидига бориб, Қозоғистон мусулмонлари диний бошқармасининг янги сайланган бош муфтиси Науризбай ҳожи Тағанули билан учрашди.

Қозоғистон Президенти бош муфтийни янги лавозими билан табриклаб, фаолиятига муваффақиятлар тилади. Учрашувда юртимизда тотувлик ва барқарорликни сақлаш, дин орқали фуқароларни аҳиллик ва бирдамликка даъват этиш, маънавий йўл кўрсатиш лозимлиги ва ёт оқимларнинг салбий ҳаракатлари ҳақида айтилди.

– Халқни аҳилликка, бирликка, иймонга чақириш лозим. Бугунги маънавий бойликни асраш, маънавиятни юксалтиришга доимий интилмасдан туриб эзгу мақсадларимизга эриша олмаймиз. Ҳозирги кунда айрим фуқаролар, айниқса, ёшларимиз ўзлари билмаган ҳолда ёт диний оқимлар ёки гуруҳларга қўшилиб қолиши мумкин. Биз бунга йўл қўя олмаймиз. Мамлакат манфаатига хизмат қилиб, шу йўналишда тўғри тарғибот-ташвиқот ишларини олиб бориш лозим, – деди Қ. Тўқаев.

Н. Тағанули Давлат раҳбарига Қозоғистон мусулмонлари диний бошқармаси олиб борадиган ахборий ва ташкилий ишлари ҳамда хайрия тадбирлари режасини таништирди. У бошқарма фаолияти иймон, ватанпарварлик, билимга интилиш, аҳил, меҳнатсевар, маданиятли ва адолатли бўлиш каби еттита маънавий йўналишга асосланишини таъкидлади.