Экологлар аҳолининг экологик маданиятини кучайтириш зарурлигига катта эътибор беришмоқда, яъни теварак-атрофни муҳофаза қилиш, шаҳар саришталигига кўнгил бўлиш муҳимлигини яна бир карра эслатишмоқда.

Вилоят табиий захиралар  ва табиатдан фойдаланишни тартибга солиш бошқармаси ходимлари шаҳарда 350 туп шалфей, заранг, каштан кўчатларини ўтқазишди. Қатор кўчаларда кўкаламзорлаштириш ишлари юритилиб, ёритиш чироқлари, ахлат қутилари ва аҳоли дам оладиган ўриндиқлар ўрнатилмоқда.

Туркистон шаҳрини кўкаламзорлаштириш ва ободонлаштиришга туман, шаҳар ҳокимликлари ва бошқармалар сафарбар этилиб, шаҳар майдони 32та мавзега ажратилган. Ҳар мавзега масъул туман, шаҳар ўз ҳудудида кўчат ўтқазиш ва ободонлаштириш ишларини бошлаб юборди.

Вилоят ҳокимининг ўринбосари М. Мирзалиев раислигида ўтган йиғилишда минтақанинг экологик аҳволини яхшилаш мақсадида 2020-2021 йилларга мўлжалланган мажмуавий ишлар ҳақида атрофлича гап юритилди. 

Унда туман, шаҳар ҳокимликлари ва барча мутасадди бошқармалар раҳбарлари атроф-муҳитни соғломлаштириш борасидаги мажмуавий режани таҳлил қилиш гоҳида атмосферани ифлослантирадиган ашёлар чиқарилишини камайтириш, шаҳарни газ билан таъминлаш, энергияни тежаш, “яшил белбоғ”ни ривожлантириш, шаҳарни қаттиқ чиқиндилардан тозалаш каби долзарб масалалар устида бош қотиришди.

Мажлис якунида қатор топшириқлар берилиб, мутасаддиларга мажмуавий иш режасининг ижросига катта эътибор берилиши уқтирилди.