Сўзоқ туманидаги “Мыңжылқы” маданият уйида Сугир Алиулининг 135 йиллиги му­­носабати билан “Куй қудрати” вилоят бас­такорлар танлови ўтди.

Вилоят маданият бошқармаси, маданият ва халқ ижодиёти маркази ва Сўзоқ туман ҳокимлиги ташаббуси билан ўтказилган танловнинг мақсади – қозоқ халқининг маданий меросини, яъни мусиқачилик санъатини тарғиб қилиш, таниқли бастакорларнинг ижодини халққа таниш­тириш, анъанавий бастакорликни ривожлантириш ва истеъдод соҳибларини аниқлаш, уларнинг ижодини қўллаб-қувватлашдан иборат.

Танловнинг очилиш маросимида Сугир Алиулининг 135 йиллигига 135 нафар созанда “Бозінген” мусиқий асарини ижро этди. 

Туман ҳокими С. Пўлатов ва вилоят маданият бош­қармаси раҳбари Н. Ахметжанов иштирокчиларга омад тилади. ҚР Маданият ва спорт вазирлиги бош таҳлилчиси Қ. Муханғалиев, ҚР Маданият арбоби, Бастакорлар уюшмаси аъзоси, “Сирдарё” университети профессори, дирижёр Бўри Иса танловга ҳакамлик қилдилар.

Вилоятнинг барча туман ва шаҳарларидаги саралаш босқичидан ўтган 16-35 ёш оралиғидаги 26 нафар даъвогар танловда иштирок этиб, натижада шимкентлик Қайирбек Қалиев бош совринга эга бўлди. Биринчи ўринга туркистонлик Ерасил Қаумбаев ва сўзоқлик Мақсат Жузбаевлар лойиқ кўрилди. Иккинчи ва учинчи ўринлар шимкентлик Бақберди Қадубек, Аруға Маккамбаева, Маржан Дарибаева ва тўлебийлик Ерлан Жўлдасларга насиб этди. 

Сўзоқ тумани ҳокимининг махсус мукофотини қази­ғуртлик Мақсут Ширшиқбаев олди. Сугир Алиули номидаги мукофот билан сариоғочлик Нурғали Ахметов тақдирланди.