Халқаро хотин-қизлар байрами арафасида давлат хизматидаги бўлган 15 нафар аёлга хизмат уйлари топширилди. 

Янги уй калитларини вилоят раҳбари Ўмирзақ Шўкеев тақдим қилди. Шу куни турли соҳа эгалари – ҳуқуқни муҳофаза қилиш идоралари ходимлари, ҳарбийлар, шифокорлар, ўқитувчилар, ижтимоий соҳа ходимлари, кам таъминланган оила аъзолари бошпанали бўлишди.

Минтақа раҳбари хотин-қизларни байрам билан қутлаб, уларга бахт, омад, ишларига муваффақият тилади.

– Ҳар байрам арафасида янги иншоотларни фойдаланишга бериш, квартира калитларини топшириш вилоятимизда анъанага айланди. Давлат ғамхўрлиги туфайли кўплаган оилалар уй тўйларини нишонламоқда. Янгидан ташкил қилинган вилоят марказига кўчиб келиб, унинг тараққиётига ҳисса қўшаётганингиздан миннатдормиз, – деди Ў. Шўкеев.

Вилоят раҳбари Туркистон шаҳрида аҳоли сонининг ўсиб боришини инобатга олиб, давлатимиз бошпана масаласига алоҳида эътибор қаратаётганини таъкидлади. Янги хонадон эгалари вилоят ҳокимини ширинликлар билан сийлашди.

Таъкидлаш жоизки, “Ўтрор” кичик туманида 336та квартирали 5 қаватли 6та уй фойдаланишга берилди. Байрам арафасида 15та оиланинг бахти кулди. Кўпқаватли уйлар қурилиши жадал олиб борилаётган шаҳарда йил охиригача 7 қаватли 24та уй битказилиб, 1452та хонадон эгалари уй тўйларини нишонлайди.