Оилавий шаклдаги ушбу марказ болалари вилоят раҳбари билан яхши таниш, сабаби, Ў. Шўкеев ўтган йили ёзда Арисда ҳалокат юз берганда биринчи бўлиб ўша марказга бориб, уларнинг аҳволи билан танишган эди.

Бу сафар байрам муносабати билан ташриф буюрган минтақа раҳбарини болажонлар зўр қувонч билан кутиб олиб, қўшиқ ва рақслар ижро этишди. 

Маълумки, марказдаги ҳар бир тарбияланувчи вилоятдаги қатор бошқармалар раҳбарларининг алоҳида диққат-эътиборида. Улар кичкинтойларни минтақадаги тарихий-маданий, диққатга сазовор жойларга олиб бориб туришади. Яқинда Қўстанайда республика чемпионати ўтиб, унда 120 кило тош кўтарган Диана Ҳакимова чемпион бўлди. Мазкур марказнинг тарбияланувчиси, полвон қиз келажакда Олимпиада чемпиони бўлишни орзу қилади.

Бугунги кунда ушбу даргоҳда 60дан зиёд бола яшамоқда. Улар турли миллат вакилларининг фарзандлари бўлса-да, давлат тили – қозоқ тилида эмин-эркин мулоқот қилишади. Ота-она меҳридан мосуво бўлган болалар оилавий анъаналар руҳида тарбияланади. Бу ерда улар еттита оила бўлиб яшашади, она ва бола тизими асосида шарт-шароитлар яратилган.

Болаларнинг алоҳида хоналари бор, компьютер синфлари, спорт бўлмалари мавжуд.

Вилоят раҳбари 98 йил муқаддам фаолиятини бошлаган Т. Тажибаев номидаги болалар уйида очилган музей билан ҳам танишди.