Туркистон вилоятида озиқ-овқат баҳоларини созлаш мақсадида кам фоизли кредит берилади

Вилоятда ижтимоий аҳамиятга эга озиқ-овқат товарлари захирасини шакллантириб, баҳосини созлаш мақсадида бир неча йўналишда ишлар олиб борилмоқда. Йирик супермаркетлар ва ишлаб чиқарувчиларга йиллик 0,01 фоиз билан бир йилга насия берилади. Буни вилоят Тадбиркорлар ижтимоий палатасининг директори Б. Жумашбеков маълум қилди.

Унинг айтишича, жамғармага керакли товарларни харид қилиш учун 650 млн. тенгега яқин маблағ кўзланган.

Бундан ташқари, Барқарорлаштириш жамғармаси томонидан давлат хариди ишлари олиб борилмоқда. 1500 тонна (гуруч, биринчи навли ун, гречка, кунгабоқар ёғи, картошка, сабзи) чамасидаги озиқ-овқат товарларига давлат харидига оид танлов эълон қилинди.

“Туркистон” ИТК ҲЖ Туркистон шаҳри ҳокимлиги, Туркистон вилоят қишлоқ хўжалиги бошқармаси, шунингдек, тадбиркорлик субъектлари билан Туркистон шаҳрида ижтимоий аҳамиятга эга товарлар баҳоларини барқарорлаштириш юзасидан биргаликда фаолият юритишга келишиб олди. Ушбу битим доирасида товарларнинг баҳосини кўтармаслик ҳамда озиқ-овқат маҳсулотлари хавфсизлигини узлуксиз таъминлашга йўналтирилган чораларни амалга ошириш режалаштирилган.