Туркистон вилояти ҳокимлиги томонидан вилоят ҳудудида инфекция тарқалишининг олдини олиш учун барча зарур тиббий, профилактик ва ташкилий чоралар кўрилмоқда. Махсус вазият маркази ташкил этилиб, штаб ўз фаолиятини бошлади. Буни вилоят ҳокимининг ўринбосари С. Қалқаманов маълум қилди.

– Санитария хавфсизлиги чораларини кучайтириб, йирик савдо нуқталари соат 10.00дан кечки 18.00 гача ишлайди. Нон ва қандолат маҳсулотлари фақат ўралган ҳолатда сотилиши керак. Кийим-кечак бозорлари соат 11.00дан 17.00гача ишлайди. Тамаддихоналар ва тўйхоналар иш вақти кечаси 22.00гача чекланиб, келувчилар сони 50 кишидан ошмаслиги керак. Спорт тадбирлари томошабинларсиз ўтади. Кенг қамровли оилавий тантаналар ҳамда хотирлаш маросимларини ўтказиш тақиқланади. Савдо марказлари, кинотеатр, театр, кўргазма, фитнес-марказлар ҳамда заллар, тунги клублар ва одамлар кўп йиғиладиган бошқа жойлар хизмати тўхтатилади, – деди Сакен Амангелдиули.

 Шу билан бирга, вилоятда мактабдан ташқари қўшимча таълим муассасалари, ҳовли клублари, уюшмалар, тўгараклар, компьютер клублари ёпилади. Карантин тартибига риоя қилмаган, тиббий ташкилотга бориб кўринишдан бош тортган фуқаролар устида назорат кучайтирилади. Жамоат жойлари ва транспортда санитария чоралари мунтазам амалга оширилади. Барча даволаш ва тиббий ижтимоий муассасалар, кексалар ва ногиронлар интернатлари ҳамда болалар уйларига бориш тақиқланади, уларда карантин жорий этилади. 

Шунингдек, брифингда вилоят ҳокимининг ўринбосари У. Тажибаев вилоят ҳокимлигининг расмий сайти қошида ахборотлаштириш саҳифасининг очилганини маълум қилди.