Бугунги кунда коронавируснинг олдини олиш борасида Тўлебий туманида ҳам зарур чора-тадбирлар амалга оширилмоқда. Жумладан, жамоат транспортида ҳаракатланувчи фуқароларимиз орасида ушбу вирус тарқалишининг олдини олиш учун автобусларда санитария ишлари бажарилмоқда. 

Бундан ташқари жамиятга бириктирилган ҳар бир йўналишдаги автобус ҳамда йўналишли таксилар белгиланган тартибда зарарсизлантирилмоқда.

«Ҳурматли йўловчилар! Жамоат транспортида ҳаракатланаётганда ортиқча ваҳимага берилиш ёки ундан фойдаланмаслик керак, деган фикрдан йироқ бўлинг. Шунчаки, жамоат жойларида гигиена қоидаларига тўлиқ амал қилинг ва тозаликка эътиборли бўлинг!» деб ёзилган эслатмалар ҳар бир бекатда йўловчиларни огоҳлантирмоқда.

– Тиббий кузатувдаги фуқароларимиз вақт-вақти билан термометриядан ўтказилмоқда, ниқобларни ўз вақтида алмаштириш ва хоналарни шамоллатиш ҳамда намли тозалаш ишларининг ўтказилиши малакали эпидемиологлар томонидан назоратга олинган, – дейди туман ҳокимининг ўринбосари С. Дуйсебаев. – Шунингдек, дезинфектор мутахассислар томонидан кунига икки маҳал ётоқхоналар, ваннахоналар ва ошхоналар зарарсизлантирилмоқда. Юқумли касалликлар шифокорлари томонидан икки маҳал тиббий кўрик ўтказилмоқда. Фуқаролар орасида тана ҳарорати меъёрдан кўтарилган ва коронавирус инфекцияси белгилари мавжуд фуқаролар аниқланмади.