Туркистон вилоятига саёҳат қилиш тўхтатилди. Бу чора, энг аввало, аҳолининг ҳаёти ва саломатлигини сақлаш, хавфли вирус тарқалмаслиги учун қилинмоқда.

Маълумки, вилоятимиз республика бўйича энг кўп маданий-тарихий обидаларга эга. Унинг ҳудудида 1600та ёдгорлик бор. Қолаверса, минтақа нафақат тарихий ёдгорликлар, балки ноёб табиатга ҳам эга. 

 Экотуризмнинг бош иншоотлари Қоратов, Ақсу-Жабағли, Сайрам-Угем, Сирдарё-Туркистон каби давлат қўриқхоналари бугунги кунда коронавирус сабабли ўз фаолиятини вақтинча тўхтатди. Ушбу табиий масканларда жойлашган меҳмонхоналар, ресторан, ётоқхона ва санаторийлар саёҳатчилар учун вақтинча ёпилиб, санитария меъёрлари асосида зарарсизлантирилмоқда. 

Айни пайтда вилоят миқёсида бундай иншоотлар сони 219та. Улардан 168таси меҳмонхона ва оромгоҳ, 51таси санаторий-профилакторий. 

Айтганча, Сариоғоч туманида ҳозир 34та сиҳатгоҳ ишлаб турибди, бу ерда фавқулодда вазият жорий этилгунга қадар келган мижозлар дам олмоқдалар.