Вилоят дезинфекция маркази мутахассислари онлайн-тартибда туманларда зарарсизлантириш ишларини бажарадиган ҳамкасбларини ўргатишмоқда. Марказ вакиласи Индира Аубакированинг айтишича, туманлардаги мутахассислардан нафақат малака, балки сифатли иш ҳам қатъиян талаб этилмоқда.

– Дезинфекция воситалари билан ишлаш учун ходимнинг ёши 18дан ошган бўлиши керак. Техник воситалар ва дезинфекцияланган суюқлик билан ишлаш чоғида махсус ҳимоя кийими кийилиши шарт. 4-тоифага кирадиган препаратларни қўллашда алоҳида билим талаб этилади, йўриқномага қатъий риоя қилиниши лозим. Дезинфекция ишлари уйда касаллар ёки ногиронлар бўлмаган пайтда бажарилади. Қолаверса, қўшниларни ҳам хабардор этиш шарт,– дейди И. Аубакирова.

Унинг айтишича, дезинфекция ишлари бажарилаётган пайтда чекиш, овқатланиш тақиқланади.  

Бахтсиз ҳодисалар рўй бермаслиги учун зарарсизлантиришда ишлатиладиган барча воситалардан услубий қўлланмаларга қараб фойдаланиш керак. Уларни бировга бериш, иш жойида қолдириб кетиш асло мумкин эмас. Ҳар бир ходим ишини битиргач, атрофини тартибга келтириб, салбий асорат қолдирмаслиги зарур.