Туркистон вилояти Полиция департаменти  раҳбари Қ. Далбеков вилоят ҳудудидаги чеклов ҳақида фуқароларга тушунтириш мақсадида блок-постларга борди. 

Юртимизда фавқулодда вазият жорий этилиши муносабати билан Туркистон вилоят полиция департаментининг  хусусий таркиби кучайтирилган режимга кўчди. Коронавирусли инфекциянинг олдини олиш мақсадида вилоятда 76та блок-пост  ўрнатилиб, уларда кеча-кундуз шифокорлар ва полициячилар ишламоқда. Шунингдек, иккита блок-пост  республика аҳамиятидаги  йўлларга ўрнатилган. 

Полиция ходимлари автотранспорт оқимини, шифокорлар – ҳайдовчилар ва йўловчиларнинг саломатлигини  назорат қилишмоқда.

– Полициячилар  фавқулодда вазият режими  бузилишининг  олдини олиш,  жамоат тартибини бузган  фуқароларни жавобгарликка тортиш, жиноятчиликка йўл қўймаслик ва аҳоли хавфсизлигини таъминлаш каби ишларни бажаришмоқда. Фавқулодда ҳолат  жорий этилгандан буён ходимларимиз томонидан   84 нафар тартиббузар маъмурий жавобгарликка тортилди. Вилоят фуқароларини чеклов чораларига масъулият билан эътибор қаратиш ва   фавқулодда ҳолат  талабларига қатъий риоя қилишга даъват қиламан, – деди Қ. Далбеков. 

Туркистон вилоят  полиция департаментининг ходимлари ёлғон ахборот  тарқатилган 9та ҳолатни аниқлашди. Уларнинг барчаси ўз вақтида очилиб, гумондор шахслар  ҚР ЖКнинг   274-моддаси бўйича жавобгарликка тортилди.