Минтақа раҳбари Ў. Шўкеев вилоят маркази аҳолисининг турмушини яхшилашнинг асосий йўналиши сифатида инфратузилмани ривожлантиришга алоҳида эътибор қаратмоқда. Шу сабабли минтақа раҳбари масъул соҳа етакчилари билан бирга вилоят марказини оралаб, шаҳарнинг Бош режасига мувофиқ амалга оширилаётган ишларни кўздан кечирди ва тегишли соҳалар раҳбарларига қатор аниқ топшириқлар берди. Шаҳардаги кўчаларни таъмирлаш, газ, ичимли сув ва канализация тармоқларини юритиш ишларини кузатган вилоят раҳбари тегишли соҳа етакчиларидан қурилишни жадвалга мувофиқ, белгиланган муддатда якунлашни талаб қилди.

 Шаҳар атрофидаги «яшил белбоғ» ҳудудида бу йил 100 гектарга дарахт ўтқазиш режалаштирилган. Бундан ташқари, шаҳарда янги лойиҳага биноан нью-йорк зинапоясини ўрнатиш, «Ғалаба» хиёбонидан марказий бозорга олиб борадиган йўл бўйини ободонлаштириш ишлари бошланди. Арис-Туркистон каналидан бошланадиган бир қанча ирригация каналлари қурилишини май ойида тўлиқ якунлаб, фойдаланишга бериш мўлжалланмоқда.

Туркистон шаҳрида 52 мингдан зиёд абонент бўлса, улардан 65 фоизига газ қувурлари тортилган. Фуқароларни табиий газ билан таъминлаш ишлари давом этмоқда. 

Шунингдек, 16 фоизи канализация тизими билан таъминланган Туркистон шаҳрининг экологик аҳволини яхшилаш мақсадида ҳар томонлама тадқиқот ишлари юритилди. Натижада шаҳарни 2021 йилгача 100 фоиз канализация тармоқлари билан таъминлайдиган 10та иншоотнинг лойиҳаси тайёрланиб, мажмуавий режага киритилган.