Мамлакатимизда фавқулодда вазият бўлишига қарамай, вилоятимизда деҳқончилик ишлари бир дақиқа бўлса ҳам тўхтагани йўқ. Айниқса, мирзачўллик миришкорлар ҳар қарич ердан унумли фойдаланишмоқда. 

Вилоятимизнинг энг жанубий тумани бўлган Жетисай деҳқонлари иккинчи ҳосил учун уруғ қадашга киришиб кетдилар. Шулардан бири – Ш. Дилдабеков қишлоқ округида фаолият юритаётган Рамазан Хўжанов қарамоғидаги 5 гектар ернинг 2 гектарига февраль ойида эртапишар карам экиб, бугунги кунгача ҳосилнинг ҳаммасини сотиб бўлди. Унинг ўрнига эса қовун экишни бошлаб юборди. 

– Ўтган йили минтақа раҳбари Ўмирзақ Шўкеев туманимизга келганда, бир ердан икки марта ҳосил олиш бўйича топшириқ берган эди. Туманимиз иқлими икки марта ҳосил олиш учун қулай бўлгани сабабли биз топшириқни уддалаяпмиз. Деҳқон хўжаликларига давлат томонидан берилаётган ёрдамни ҳам айтиш жоиз. Ҳукуматимиз бизни қўллаб-қувватлаб турибди, шунинг учун ҳам ишимиз баракали бўлмоқда. Карамни тўлиқ йиғиштириб олиб, қовун уруғини экяпмиз. Фавқулодда вазият даврида меҳнат қилиш учун шароит яратиб бераётган вилоят раҳбари Ўмирзақ Шўкеевга алоҳида миннатдорчилик билдирамиз, – деди Рамазан Хўжахмат ўғли.

Умуман олганда, Жетисай туманида 11361 гектар майдонда плёнка остига қовун ва тарвуз экиб қўйилди.