Туркистон вилоятида COVID-19 вирусини юқтирганлар сони 50дан ошиб кетди. Шу муносабат билан, вилоят ҳокимининг ўринбосари Сакен Қалқаманов Вазият марказида фуқароларнинг ҳаёти ва соғлигини ҳимоя қилиш, аҳоли ўртасида коронавирус инфекцияси тарқалишининг олдини олиш мақсадида 2020 йил 18 апрель куни соат 24.00дан карантин режими жорий этилишини маълум қилди.

Яъни, шу вақтдан бошлаб қўшни минтақалар билан чегарадош санитария-назорат бекатлари иши кучайтирилади. Шаҳарлараро, туманлараро ва аҳоли манзиллари орасида қатнов чекланади, шунингдек, жамоат ва хусусий транспорт хизматлари тўхтатилади. Санитария-эпидемиология вазиятининг барқарорлиги учун жамоат жойлари ва дам олиш жойлари, истироҳат боғлари ёпилади. Озиқ-овқат ва кийим-кечак, маиший буюмлар сотиладиган бозорлар ёпилади. Бундан ташқари, шу кунгача эшик олдида, кўп қаватли уйларнинг ҳовлисида ўйнаётган болаларнинг ўйин майдончаларида ўйнаши тақиқланади.

–Оилавий байрамлар, туғилган кунлар ва тўйларни ўтказиш тақиқланади. Уч кишидан ортиқ гуруҳларнинг кўчаларда ва жамоат жойларида тўпланиши ман этилади. 65 ёшдан ошган фуқаролар уйдан чиқмаслиги керак. Аҳолига фақат зарур озиқ-овқат ва дори-дармон сотиб олиш учун уйлари яқинидаги дўконлар ва дорихоналарга боришга рухсат берилади. Озиқ-овқат дўконларининг фаолияти соат 9.00 дан 20.00 гача чекланади, – деди вилоят ҳокимининг ўринбосари.

Аҳолининг ҳаёти учун зарур озиқ-овқат, буюмлар ва саноат корхоналари, қурилиш иншоотлари, баҳорги экиш ишларига керакли ишлаб чиқариш товарлари, материаллар, тиббиёт воситаларини ташиш учун рухсатномаси бўлган транспорт воситалари ва фуқаролар, тиббий ёрдамга муҳтож кишиларгина минтақага кириб-чиқишлари мумкин.

Таъкидлаш керакки, қурилиш соҳаси, баҳорги экин-тикин ишлари, бандликни таъминлаш йўл харитаси, тирикчиликни таъминловчи иншоотлар карантин режимига қарамай, фаолиятини тўхтатмайди.