Қозоғистон жаҳонда бензин энг арзон бўлган мамлакатлар ўн бешталигига киради. 13 апрелдаги маълумотларга кўра, дунёда 1 литр АИ-95 маркали бензиннинг ўртача нархи 0,95 АҚШ доллари ёки 404,5 тенгени ташкил қилади. Энг арзон бензин – Венесуэла давлатида. Бу ерда АИ-95 маркали бензиннинг бир литри 1 тенгедан ҳам арзон. Эрон (0,09 АҚШ доллари ёки 39,2 тенге) ва Судан (0,14 АҚШ доллари ёки 59,6 тенге) бензин нархи энг паст бўлган мамлакатлар учталигига киради. ТОП-5 қаторида Ангола (0,28 АҚШ доллари ёки 121,4 тенге) ва Малайзия (0,29 доллар ёки 123,7 тенге) ҳам бор. Қозоғистон айни дамда бензин арзон мамлакатлар ичида 11-ўринда турибди. 13 апрелдан бошлаб мамлакатда таъкидланган маркали бензиннинг ўртача баҳоси 0,41 АҚШ доллари ёки 174 тенгени ташкил қилмоқда. Бу – МДҲ мамлакатлари орасида энг паст нархдир. 

 2020 йил март ойида Қозоғистонда АИ-92 маркали бензиннинг ўртача чакана нархи бир литри учун 155,02 тенге бўлиб, йил давомида 4 фоизга ва аввалги ойга нисбатан 0,5 фоизга ўсди. Ушбу бензиннинг энг қиммати Нур-Султан (160 тенге), Кўкшетов (158 тенге) ва Ўскемен (158 тенге)да қайд этилган. Қозоғистонда АИ-95 ва АИ-96 маркали бензиннинг ўртача чакана нархи йил давомида 2,7 фоизга –173,79 тенгегача ва жорий йилнинг февраль ойига нисбатан 0,1 фоизга ошган. Ёзги дизель ёнилғиси 0,1 фоизга арзонлашиб, бир литри 192,63 тенгени ташкил қилди. Энг қиммат дизель Кўкшетов (198 тг), Қўстанай (197) ва Атиров(196) шаҳарларида қайд этилган.