ҚР Президенти пойтахтдаги модулли юқумли касалликлар шифохонаси фаолияти билан танишди.

Давлат раҳбари Нур-Султан шаҳридаги коронавирус пандемияси сабабли фавқулодда вазият муносабати билан янгидан қурилган модулли юқумли касалликлар шифохонасига борди.

Тиббиёт муассасасининг умумий майдони 7 минг квадрат метрни ташкил қилади. Уни қуриш учун республика бюджетидан 5,5 миллиард тенге ажратилди. 

 200 ўринли шифохона замонавий тиббий ускуналар билан жиҳозланган бўлиб, тиббиёт ходимлари ва беморларнинг хавфсизлигини таъминлайди. 

ҚР Соғликни сақлаш вазири Елжан Биртанов Президентга эпидемияга қарши курашда тиббий ёрдамга оид муаммолар ва уларни ҳал этиш йўллари тўғрисида ҳисобот берди. Давлат раҳбари беморларни даволаш учун барча зарур жиҳозлар билан таъминланган даволаш-профилактика хоналари ва палаталарни кўздан кечирди. 

 Давлат раҳбари ушбу шифохона мамлакатда биринчи бўлиб ташкил этилганини таъкидлади ва қурувчиларга ўз миннатдорчилигини билдирди. Шифокорлар билан суҳбат чоғида Қозоғистон Президенти ватандошларимизнинг соғлигини сақлаш учун тинимсиз ишлаётган тиббиёт ходимларига миннатдорчилик изҳор этди. 

– Сиз пандемияга қарши курашда олдинги сафдасиз. Сиздан жуда миннатдормиз. Кечаю кундуз ишлаяпсиз. Афсуски, биз шифокорларимизни Алматидаги эпидемиядан ҳимоя қила олмадик. Биз ҳозирги фавқулодда вазиятни бартараф этиш учун курашмоқдамиз. Шунинг учун эҳтиёт бўлишингиз керак, авваламбор ўз соғлигингиз ҳақида қайғуринг, – деди Президент. 

Қозоғистон Президенти фуқаролар соғлигини сақлаш давлатнинг асосий вазифаси эканлигини таъкидлади. Унинг сўзларига кўра, ҳозирги инқирозда фақат соғлом миллатгина омон қолади. 

– Кенг қамровли чораларни кўриш керак. Биз постсовет маконида биринчилардан бўлиб керакли чораларни кўрдик. Фуқароларимиз учун карантин режимини сақлаш осон эмаслигини тушунаман. Аммо бошқа йўл йўқ. Қандай бўлмасин, биз шу ойнинг охирига қадар карантин режимини сақлаб турамиз. У ёғини кейин ўйлаб кўрамиз. Эҳтимол, муаммони ҳал қилишнинг янги усуллари топилар. Чунки одамлар аста-секин уйларидан чиқиши лозим, – деди Қасим-Жўмарт Тўқаев. 

Президент, шунингдек, иқтисодиётни қўллаб-қувватлаш муҳимлигини таъкидлади.