ҚР Бош вазири Асқар Мамин Шимкент ва Туркистонни ривожлантириш лойиҳаларини текширди А. Мамин хизмат иш сафари доирасида Шимкент ва Туркистон ша­ҳар­­­ларининг транспорт ва ижтимоий-маданий инфратузилма иншоотларининг қурилиши билан танишди.

Шимкентда Ҳукумат раҳбарига бу йил декабргача битказиш кўзланган, ўтказиш салоҳияти соатига 2000 йўловчини ташкил этадиган халқаро аэропорт янги йўловчилар терминалининг қурилиши ҳақида маълумот берилди.

Бош вазир Туркистонда янги халқаро аэропорт ҳамда унга олиб борадиган автомобиль йўлининг қурилиш жараёни билан танишди. Иншоот вилоят марказидан 16 чақирим масофада жойлашган ва бу йил сентябрь ойида фойдаланишга топширилади. Терминалнинг ўтказиш қуввати йилига 3 млн. йўловчини ташкил этади.

А. Мамин Конгресс-холл, 7 минг ўринга мўлжалланган стадион, Ўқувчилар саройи, бассейнли спорт мажмуаси, истироҳат боғи, драма театр ва бошқа иншоотларини оралаб, Буюк Ипак йўли ҳунармандларининг миллий маркази иншоотини реконструкциялаш жараёнини кўздан кечирди. Шунингдек, Ҳукумат раҳбари ҳар бири 120 хонали «Rixos Turkestan» ва «Hampton by Hilton» меҳмонхоналари, Туркиянинг «Sembol construction» компанияси қураётган “Карвон сарой” кўптармоқли сайёҳлик мажмуаси қурилиши билан танишди. Мазкур меҳмонхоналарни жорий йилда фойдаланишга берилиши режалаштирилган.