Қозоғистон ва Ўзбекистон Бош вазирлари Туркистон вилояти Мирзакент овулида янги кичик туманга пойдевор қўйишди

ҚР Бош вазири Асқар Мамин Мақтаарал тумани, Мирзакентда Ўзбекистон Республикасининг Бош вазири Абдулла Орипов билан учрашди. 

Ҳукумат раҳбарлари туманда сув босган ҳудудларни оралаб, Жанажўл қишлоқ округидаги Нурлижўл, Ўргебас ва Фирдавсий қишлоқларида олиб борилаётган, сув тошқини оқибатларини бартараф этиш ишлари билан танишдилар.

Авария-қутқарув ва пайсалга солиб бўлмайдиган ишларга 1300 нафардан зиёд одам ва 220та техника, шу жумладан, Ўзбекистондан 200 нафардан зиёд мутахассис, 100га яқин ўт ўчириш машинаси, экскаватор, трактор, сув сўрғич ва бошқа техника сафарбар этилди.

Мақтаарал тумани маркази – Мирзакентда Қозоғистон ва Ўзбекистон Бош вазирлари янги кичик туманнинг қурилиш режаси билан танишиб, дастлабки уй пойдеворини қўйиш маросимида қатнашди ва аҳоли билан учрашди.

Мирзакентнинг Женис, Жанатурмис, Дўстиқ аҳоли манзилларида 500та оила учун хусусий уйлар, мактаблар, болалар боғчалари, фельдшерлик пунктлари қуриш режалаштирилган. Қурилиш ишларини Қозоғистон ва Ўзбекистон қурувчилари олиб боришади.

Асқар Мамин ва Абдулла Орипов Фирдавсий қишлоғида зарар кўрган уйларни асл ҳолига келтириш ишларини текшириб, маҳаллий аҳоли билан мулоқотда бўлишди. А. Мамин Давлат раҳбарининг топшириғига кўра, сув тошқинидан зарар кўрганларнинг барчаси бошпана билан таъминланишини алоҳида таъкидлади.