Мақтаарал туманидаги озиқ-овқат омборига бугунги кунга қадар 408 тонна гуманитар ёрдам келиб тушган. Унинг 96 тоннаси эвакуация бекатларида, қариндошлари уйида яшаётган фуқароларга тарқатиб берилди. Буни Nur Otan партияси вилоят филиали раисининг биринчи ўринбосари, фавқулодда вазиятлар бўйича гуманитар ёрдамни мувофиқлаштирувчи Бейсен Тажибаев маълум қилди.

Мақтаарал туманидаги сув тошқинидан зарар кўрган кишиларга ёрдам сифатида вилоятимизнинг туманларидан ташқари, Нур-Султан, Алмати, Шимкент шаҳарларидан, Жамбил, Қизилўрда, Павлодар вилоятларидан турли жамоат ташкилотлари ва хайрия жамғармаларидан ҳамда тадбиркорлардан гуманитар ёрдам етказилмоқда. 

Гуманитар ёрдамнинг кўплаб келаётгани туфайли бир омбор маҳсулотларга тўлиб кетди. Айни пайтда иккинчи омбор белгиланиб, озиқ-овқатлар шу ерга йиғиляпти. Омборга масъул, вилоят фахрийлар кенгаши раисининг биринчи ўринбосари Кенжехан Тўлебаевнинг айтишича, ҳозир жамланган ёрдам келгуси икки-уч ойга етиши даркор. Пунктлардан ташқари, қариндошларининг  уйларида яшаётган одамлар учун ҳам Атакент аҳоли манзилида иккита тарқатиш бекати ишлаяпти. Улар 9-сонли ҳамда Комаров номидаги мактабларда жойлашган. Тошқин юз берган 5та қишлоқ аҳолиси шу ерга бориб, уйларига озиқ-овқат олишлари мумкин.

Штаб омборида ҳозирги кунда озиқ-овқат жамғармаси етарли. Навбатда ошхонага зарур идиш-товоқ, уй жиҳозлари, телевизор ва музлатгич, газ плитаси сингари маиший техникага эҳтиёж туғилиши мумкин. Хайрия қилувчи ҳамюртларимиз ва компаниялар ушбу жиҳатларни эътиборга олсалар, деган таклиф бор. Таъкидланган буюмлар янгидан барпо этилиб, фойдаланишга бериладиган уйларга ҳаводай зарур. Ўтганда жиҳозлар ҳар бир уйга тақсимлаб берилади.