Мақтаарал тумани Атакент овулидаги вилоят марказлаштирилган омборига видеоназорат ускуналари ўрнатилди. Бу ўз навбатида озиқ-овқатнинг исрофсиз тарқатилиши, ноўрин ишлатилишига тўсиқ бўлади. Буни Nur Otan партияси вилоят филиали раисининг биринчи ўринбосари Бейсен Тажибаев маълум қилди.

Омбордаги 4та видеокамера иккита юк қабуллаш эшиги ва чиқавериш дарвозасига жойлаштирилди. Яъни омборга келган ва кетган юк машинаси суратга туширилади. Бир неча видеокамера марказлаштирилган битта компьютерга уланиб, бошқарилади. 

– Камера ўрнатишдан мақсадимиз – эл омонатига хиёнат қилиш ҳолатларининг олдини олиш. Шу билан бирга озиқ-овқат исрофига йўл қўймайслик. Қолаверса омборда сақланган буюмларнинг кимга, қачон берилганини аниқлашда асқотади. Келгусида бу ерда йиғилган озиқ-овқат тошқиндан зарар кўрганларга беками кўст, исрофсиз етказилишига жуда аҳамият берилади, – дейди Бейсен Даулетули. 

“Биргаликда кўтарган юк енгил” деганларидек, куни кеча омборга Павлодар вилоятидан 20 тонна озиқ-овқат ва 15 тонна кийим-кечак ва гигиена буюмлари келди. Маълумки, ушбу омбор 2020 йил 3 майдан бошлаб сув босган аҳоли манзилларига ёрдам кўрсатиш мақсадида ташкил этилган эди. Бу ерда сўнгги бир ҳафтада 408 тоннадан зиёд гуманитар ёрдам йиғилди. Чунончи, 97 тонна ун, 2,5 тонна гўшт, 95 тонна ғалла, 61 тонна сабзавот, 6 тонна консерва, 26 тонна суюқ мой, 65 тонна махсус тайёрланган озиқ-овқат саватлари, кийим-кечаклар ва гигиена буюмлари қабулланган. Шундан 100 тоннага яқини Мақтаарал туманидаги 11та эвакуация марказига жойлаштирилган фуқароларга улашилган. Қариндош-уруғларининг уйларига вақтинча кўчган одамларга эса Атакентдаги 9 ва 7-сонли умумий ўрта мактабларда очилган омборлардан озиқ-овқатлар рўйхат бўйича тарқатилмоқда.