Мақтаарал туманига Жамбил вилояти, Қўрдай туманидан гуманитар ёрдам келди. Ушбу хайрия карвонини Қўрдай тумани ҳокимлиги, ҚХА ва “Жамбил вилояти “Винхуа” дунганлар уюшмасининг маданият маркази” жамоат бирлашмаси уюштирди.

5 млн. тенгелик гуманитар ёрдам фавқулодда вазият штабининг марказий омборига етказилди. Уни кўнгиллилар ва масъул шахслар қабул қилиб олди. Чунончи, 11 тонна ун, 2,5 тонна қанд, 2,5 тонна гуруч, 1,5 тонна макарон, 1500 литр ўсимлик мойи, 5,3 тонна картошка, 500 кило пиёз, 300 кило туз, 1000 қути чой ҳамда маиший тозалаш буюмларини қўшганда жами 30 тоннага яқин товар келтирилди.

Дунган этноси вакиллари мақтааралликлар билан бирга эканликларини исботлаб, Мирзачўл аҳли тез кунларда қаддини тиклаб олишларига тилакдош эканларини маълум қилишди. Карвонни бошлаб келган Қўрдай тумани, Сўртўбе овули ҳокими Илияс Буларов Қозоғистон халқи бир муштдек жипс бўлса, ҳар қандай довонни забт этишини таъкидлади.

Nur Otan партияси Туркистон вилоят филиали раисининг биринчи ўринбосари Б. Тажибаев қийин вақтда жонкуярлик билдириб, саховат кўрсатган қўрдайликларга миннатдорлик билдирди.