Шимкент шаҳри ҳокими Мурат Айтенов раислигида табиий офат оқибатларини бартараф этиш ва олдини олиш ишларига бағишланган йиғилиш ўтказилди.

Унда шаҳар Фавқулодда вазиятлар департаменти раҳбари Нурбўлат Дербисов жала оқибатида тоғдан келган селдан Елтай аҳоли манзилида яроқсиз аҳволга тушган уйлар йўқлигини маълум қилди. 

Унинг айтишича, тошқин сув 38та уйга зарар етказган. Бироқ у бошпаналар фақат жорий таъмирлашга муҳтож. Бундан ташқари 12та қўра-бостирма қулаган. Уларнинг ҳужжати йўқлиги сабабли давлат томонидан товон тўланмайди.

Шунингдек, икки бош қорамол сувда оқиб кетган.

Йиғилишда сўзга чиққан шаҳар ҳокимининг биринчи ўринбосари Ербўл Садир тошқин асоратларини аниқлаш ва вужудга келган чиқим миқдорини ҳисоблаш ишлари махсус комиссия томонидан олиб борилаётганини айтди. 

– 13 майдан 14 майга ўтар кечаси 40 дақиқада ярим ойлик ёмғир ёққан. Шунинг натижасида, Бодом ўзани орқали ўтган сув миқдори секундига 146 куб метргача етган. Яъни сув маромидан етти баравар кўп бўлган. Ҳозир секундига 49 куб метр сув оқмоқда. Бу, ўзан суви пасаймоқда, дегани. Шаҳар, қишлоқ хўжалиги, энергетика бошқармаси томонидан шаҳардаги хатарли жойлар аниқланди. Шунга қараб 4та туман ҳокимларига топшириқлар берилди. Масалан, Абай тумани Бодом ўзани қирғоғини мустаҳкамлаш ишларини олиб бормоқда, – деди Ербўл Садир. 

Айтганча, об-ҳавони тахмин қилувчилар Шимкентда келгусида яна ёғингарчилик бўлишини айтишмоқда. Шу сабабли, шаҳар раҳбарияти томонидан ҳимоя чоралари кучайтирилади.