Вилоят ҳокими Ў. Шўкеев қурилиши битган иншоотларда бўлди. Қад кўтарган иморатларда ички пардозлаш ва ободонлаштириш ишлари олиб борилмоқда. Минтақа раҳбари барча ҳордиқ масканларига сифатли газон тўшашни, шунингдек, хиёбондаги дам олиш жойларига енгил ва қулай конструкциялар ўрнатишни топширди.

Департаментлар ва бошқармалар биноларида ички безаш ишлари олиб борилмоқда. Маъмурий-тадбиркорлик марказида жойлашган бинолар билан бир хил дизайнда қурилган иншоотнинг ички кўриниши ҳам ўта замонавий.

Ўмирзақ Естайули шаҳар марказида жойлашган Дендробоғ қурилишида бўлди. 28 гектарни ишғол этган яшил ҳудудда турли мевали дарахтлар ўтқазилган. Бу ерда амфитеатр, фавворалар ва сунъий кўприклар ясалган. Вилоят ҳокими ушбу лойиҳага масъул раҳбарларга қурувчилар сонини кўпайтиришни топширди.

– Қурилишда одам оз. Маблағ ажратилгач, куну-тун ишлаш керак. Дастлаб дарахтларни суғориш тармоғини тартибга келтиринглар. Сунъий кўл майдонини кенгайтириш керак. Энг муҳими, болалар майдончасидаги қурилиш сифати ва хавфсизлигига катта эътибор қаратилиш, – деди вилоят ҳокими.

Шу куни Ўмирзақ Шўкеев Нурсултан майдони, аттракционлар хиёбони, Яссавий музейи, Тўнғич Президент боғи ва бошқа боғларни оралади. Ободонлаштириш ва кўкаламзорлаштириш ишларининг жадвалга мувофиқ тугатилишини топширди.