Қозоғистон мусулмонлар диний бошқармаси раиси Науризбай қажи Тағанули Туркистон вилоятига махсус сафар билан келиб, тошқиндан зарар кўрган мақтааралликлар билан учрашди ва бу ердаги аҳвол билан танишди.

– Офат айтиб келмайди. Яратганнинг синови экан. Сабр билан шу синовдан ўтиш насиб этсин. Маълумингизким, элимизнинг ҳамма минтақаларидан инсонпарварлик ёрдами келяпти. Барча қозоғистонликлар ёрдам қўлини чўзмоқда. Ҳар бир ишнинг хайрли интиҳоси бўлади, деганларидай, Аллоҳ насиб этса, ҳукумат томонидан қурилаётган уйларга кўчиб ўтасизлар. Бундан буён қувончли кунларингиз кўп бўлсин, – деди бош муфти.

Н. Тағанули ўзи олиб келган 30 тонна унни омборга топширди. Шунингдек, у хайрия ёрдами сифатида жамғарма махсус ҳисоб рақамига ўтказиладиган 10 миллион тенгелик сертификатни топширди.

Сафар ниҳоясида Науризбай қажи Жетисай туманига бориб, "Бошпанага йўл" хайрия жамғармаси доирасида қурилган 3та уйнинг калитини ижтимоий кам таъминланган оилаларга тантанали равишда топширди.