“Сардоба сув омборидан Мақтаарал тумани ҳудудига оқиб келган балиқларни еб бўлмайди”. Бу ҚР Қишлоқ хўжалиги вазирлигига қарашли Ветеринария кузатуви ва назорати қўмитаси “Республика ветеринария лабораторияси” мутахассисларининг хулосаси. Уларнинг айтишича, бу балиқларнинг ички аъзоларида бактерияларнинг бир неча тури борлиги маълум бўлган. 

–Биз сув босган аҳоли манзилларидаги балиқларнинг яроқлилигини аниқлаш мақсадида 12 май куни 4та балиқни “Республика ветеринария лабораторияси”га юборган эдик. Бугун қўлимизга таҳлил хулосаси келиб тушди. Унга кўра биз сув босган ҳудудларда балиқ овлаб бўлмаслигидан огоҳлантиряпмиз, – деди вилоят ўрмон хўжалиги ва ҳайвонот дунёси ҳудудий инспекцияси балиқчилик хўжалиги бўлимининг раҳбари Шакен Бўранбай. 

Шу сабабли инспекция кўлмак сувлардаги балиқларни овлаб, ейиш ва сотиш ҳолатларини бартараф этиш ишларини бошлаб юборди. Шунингдек аҳоли орасида кўлмаклардаги балиқларни овлаш ва истеъмол қилиш мумкин эмаслиги юзасидан тарғибот ишлари давом этмоқда.