Эпидемиологик аҳвол инобатга олинган ҳолда Туркистон вилоятида карантин 8 июнгача узайтирилди. Шу муносабат билан минтақада қатор чекловлар сақлаб қолинади. Буни вилоят раҳбари онлайн-брифингда маълум қилди.

–Ҳаво орқали тез тарқаладиган мазкур касалликнинг ҳозирча аниқ вакцинаси йўқ. Вирусни йўқ қилиш учун шифокорлар куну тун тиним билмай тер тўкишмоқда. Вилоятимизда 300дан кўпроқ киши мазкур касалликка чалинган бўлса, 180 нафарга яқини тузалиб, оиласи бағрига қайтди. Афсуски, COVID-19 инфекциясини юқтирганликда гумон қилинаётган фуқаролар кўчада бемалол, қариндош-уруғлариникига бориб юрибди. Бу яхши эмас. Вирус вилоят миқёсида, ҳар бир туманда кўпайиб бормоқда. Унинг олдини олмасак, оқибати аянчли бўлади. Болаларда вирусга чалингани билинавермайди,  қарияларда эса жараён оғир кечади. Оиламиз, ота-онамиз, яқинларимизнинг соғлигини ўйласак, карантин меъёрларига қатъий амал қилишимиз зарур. Ҳуқуқни муҳофаза қилиш идораларига чеклов чораларини бузганларни аямасдан жазолашни топширдим. Тадбиркорлар ҳам бундан мустасно эмас, – деди Ў. Шўкеев. 

Сўнгги маълумотларга кўра, вилоятимизда 337 кишида коронавирус инфекцияси аниқланган, 187 киши эса касалликдан фориғ бўлиб, уйига қайтган.