Туркистон вилояти ҳокимлиги, “Узагротехсаноатхолдинг” ҲЖ ва “Orbis Kazakhstan” компаниялари ўртасида қишлоқ хўжалиги техникасини йиғиш лойиҳасини амалга ошириш доирасида сармоявий шартнома ва йўл харитаси имзоланди. Ўзбекистон делегациясини вилоят раҳбари Ўмирзақ Шўкеев қабул қилди.

Ўзбекистоннинг “Узагротехсаноатхолдинг” давлат компанияси Қозоғистоннинг “Orbis Kazakhstan” компанияси билан ҳамкорликдаги лойиҳани “Turkistan” индустриявий минтақасидаги “Brownfield” саноат майдонида амалга оширишдан манфаатдор.

Уч босқичда амалга ошириладиган лойиҳанинг сармоявий қиймати тахминан 12 млн. АҚШ долларини ташкил қилади. Бу ерда 100га яқин янги иш жойи пайдо бўлади.

Корхонада кенг қўлланиладиган қишлоқ хўжалиги техникаси – ерни шудгорлаш универсал трактор, пахтачиликка мўлжалланган трактор, уларнинг тиркамалари, роторли-ўроқли, сўқа ва бошқа техника воситаларини йиғиш кўзланган. Шунингдек, “Узагротехсаноатхолдинг” қозоғистонлик мутахассисларни ўқитиш ва малакасини ошириш, амалий тренинглар ўтказишни ҳам зиммасига олмоқда.

Учрашувда Ў. Шўкеев бундай лойиҳаларнинг амалга оширилиши икки мамлакат учун ҳам самарали бўлишини таъкидлади. 

– Қозоқ ва ўзбек ҳамкорлиги Туркистон вилоятининг ривожида алоҳида ўрин тутади. Ўзбекистон бизнинг минтақа учун савдо-иқтисодиёт соҳасидаги (23,8 фоиз ёки 170,2 млн. АҚШ доллари) иккинчи йирик ҳамкор мамлакатдир. Элимиздаги 185 мингта техниканинг 76 фоизи, вилоятимиздаги 19 мингта техниканинг 83 фоизи эскирган. Биз имзолаган шартнома муаммони ҳал этишга ёрдам беради, – деди вилоят ҳокими. 

Учрашувда “Узагротехсаноатхолдинг” ҲЖ бошқаруви раиси Н. Отажонов вилоятимизнинг сармоявий аҳволига юқори баҳо берди.