Қўшним тўйдан отиб келди,

Ростин айтсам, ётиб келди.

Номус орин йўқотиб

Бор гуноҳга ботиб келди.

Остонада турганча 

Ҳақоратлар хотинин,

Кайфи тароқ, тингламас,

Аёлининг дард-додин.

Қўрқоқ олдин дўқ қилар,

Халқда шундай нақл бор.

Ким тинчликни сақласа

Шу инсонда ақл бор.

Қайноқ чой лаб куйдирар,

Бироз дам бермоқ керак.

Боболарнинг гапини 

Қулоққа илмоқ керак.

Тиш ортида тил турар

Тиёлмасанг ҳуради.

Тоқат қилиб донолар

Тилин тишлаб туради.

Уй-рўзғорин ўйлайди

Аёлларнинг оқили.

Акс ҳолда чўктирар

Иғволарнинг оқими.

Ширин сўзлаб қўшним ҳам

Таслим қилди эрини.

Ухлатиб қўйди кейин

Занжир узган шерини.

***

Гап талашиб баъзилар

Эрин ташлаб кетади.

Мукаммал ёр тополмай

Ўзин сарсон этади.

Тақдирга берайлик тан,

Бир кунлик аччиқ ўтар.

Сабр қила олган ёр

Албат муродга етар.

Ҳаётингни ўхшатгил

Йилнинг тўртта фаслига.

Ҳурматин жойига қўй,

Эринг келар аслига.

Ўғил-қиз улғайганда

Инсоф кириб қолади.

Бор айбини ўшанда

Ўз бўйнига олади.

Яхши бор ерни баъзан

Оралайди ёмон ҳам.

Бахтнинг қадри билинмас,

Баъзида келмаса ғам.

Ҳеч кимдан кам қилмасин

Қатордаги норидан.

Айирмасин кўз очиб

Кўрган азиз ёридан.