Мақтаарал туманида ижтимоий масалаларга доир ишчи гуруҳнинг мажлиси ўтди. 

Унда вилоят Қозоғистон халқи ассамблеяси котибияти мудири, Мақтаарал туманидаги вилоят штабининг ижтимоий масалалар бўйича етакчиси Ғани Рисбеков, Nur Otan партияси вилоят филиали раисининг биринчи ўринбосари Бейсен Тажибаев, туман партия филиали вакиллари, тошқиндан жабр кўрган овул округлари ҳокимлари, ҳуқуқни ҳимоя қилиш органлари ва туман ҳокимлигининг мафкура бўлими раҳбарлари ва мутахассислари иштирок этдилар.

Мажлисда Ғ. Рисбеков тошқиндан зарар кўрган фуқароларга товонни жадаллик билан тўлаш, бугунги аҳволини яхшилаш, Ўргебас, Фирдавсий қишлоқларида қурилиш ишларига кўмаклашишни тезлатиш лозимлигига тўхталди.

Б. Тажибаев эса фуқароларга тўловларни тезроқ тўлаш учун малакали мутахассисларни жалб қилиш, аҳоли билан тиғиз алоқа ўрнатиш, тушунтириш ишларини уюштириш кераклигини таъкидлади.

Сўнг махсус гуруҳ Мирзакент қошида қад кўтараётган янги кичик тумандаги бунёдкорлик ишлари билан танишди. Таъкидлаш жоизки, бу ерда 383та уйнинг қурилиши олиб борилмоқда. Улардан 193таси ҳукумат захираси маблағига, 190таси жамғармалар ҳисобидан, шу жумладан, 20таси партиянинг ”Биз биргамиз!” жамғармаси қўллови билан қуриляпти. Бейсен Тажибаев қурувчилар билан суҳбатлашиб, уларнинг бугунги тирикчилиги билан танишди.

Ҳозирги кунда янги кичик туманда 188та уйнинг пойдевори қаланиб, 73тасининг девори кўтарилмоқда, иккита уйнинг томи ёпиляпти. Қурилиш ишлари икки босқичда олиб борилмоқда. Уй қурилиши учун керакли материаллар ва техника етарли.