Қозоғистонда яна иккита тун ярмигача фаолият юритадиган Аҳолига хизмат кўрсатиш маркази очилди. “Фуқароларга мўлжалланган ҳукумат” давлат корпорациясининг марказларни тун ярмигача ишлатишга оид пилот лойиҳаси давом этмоқда. Энди давлат хизматидан фойдаланиш учун ариза бериш ёки тайёр маълумотнома олиш имкони нафақат астаналикларга, балки Алмати ва Шимкент шаҳри фуқароларига ҳам насиб этади.

“Фуқароларга мўлжалланган ҳукумат” давлат корпорацияси бошқаруви раиси Абилайхан Ўспановнинг айтишича, Астанада илк бор соат 24:00 гача ишлайдиган Сауран, 7 манзилидаги аҳолига хизмат кўрсатиш маркази бунга яққол мисол бўла олади. 

– Биз пилот лойиҳага мониторинг юритдик. Уни ишга туширган вақтдан бошлаб, соат 20:00дан 24:00гача марказ икки минг аризани қабул қилиб, 506та ҳужжат берган. Бундай эҳтиёжни эътиборга олган ҳолда, тун ярмигача иш жадвалини Шимкент ва Алмати шаҳарларидаги бўлимларда ҳам жорий этдик. Сабаби, булар аҳоли сони бўйича энг катта шаҳарлардир, – деди А. Ўспанов.

Иш жадвали бўйича душанба ва жума оралиғида соат 8:00дан 24:00гача фаолият юритадиган фронт-офислар Астана ш., Сауран,  7; Алмати ш. , Ауезов тумани, Жандўсов к/си, 51; Шимкент шаҳри, Қаратау тумани, Нурсат кичик тумани, 24 манзилларида жойлашган.

Хизмат олиш учун келганларга қулай бўлиши учун, давлат бож солиғини шу бўлимларда соат 24:00гача тўлаш мумкин. Сабаби, кассалар ҳам тун ярмигача ишлаш тартибига кўчирилди. Шанба куни бу бўлимлар соат 20:00гача ишлайди.