Вилоятда 23 июнь – Давлат хизматчилари куни муносабати билан “Қозоғистон Халқи Ассамблеяси” биносида тантанали тадбир ўтди. Унда вилоят ҳокими Жансейит Туймебаев минтақамиздаги  барча давлат хизматчиларини касб байрамлари билан қутлаб, элимизнинг тараққиёти, ривожланиши йўлида олиб бораётган ишларида муваффақиятлар тилади.

– Давлат хизмати – бу бутун давлатни бошқариш тизимининг муҳим устунларидан бири. Ҳар қандай жамият давлат бошқарувисиз, яъни давлат хизматчиларисиз ҳаракатланиши, олға интилиши, ривожланиши мумкин эмас. Ҳозирги  талабларга мос равишда ҳокимиятга бўлган ишонч ҳам давлат хизматчиси орқали шаклланади. Вилоятимизнинг жадал ривожланиши сизларнинг касбий маҳоратларингизга, тажрибаларингизга, интилиш ва куч-қувватимизга  боғлиқ. Яна бир бор барчангизни касбий байрамингиз билан чин юракдан табриклайман!, – деди минтақа раҳбари.

Тантанали йиғилишда давлат хизмати соҳасида кўп йиллардан буён фидокорона хизмат қилиб, ўз лавозимий бурчларини бекаму кўст бажариб келаётган, меҳнат фаолияти давомида юқори кўрсаткичларга эришган қатор давлат хизматчилари ҳоким қўлидан “Энг яхши давлат хизматчиси” медали ва Жанубий Қозоғистон вилоятининг “Вилоятга кўрсатган хизмати учун” кўкрак нишони, вилоят ҳокимининг Фахрий ёрлиғи ва Ташаккурномалари билан тақдирланган бўлса, яна бир гуруҳ ходимлар ҚР Давлат хизмати ишлари ва уюшган жиноятчиликка қарши агентлик раисининг ташаккурномаси, вилоят маслаҳатининг ёрлиқлари билан тақдирландилар. Шунингдек, бир қанча илғор ходимларга Туркия давлатида тажриба алмашиш учун махсус сертификатлар топширилди. 

Тантанали тадбир давоми концерт дастурига уланиб кетди.