Муқаддам газетамиз саҳифасида «Улес» хайрия жамоат жамғармаси раиси Райимжон Қўчқоров йўллаган лавҳани – туркистонлик 28 ёшдаги Алиакбар Йўлдошевнинг Жанубий Корея мамлакатидаги жасорати ҳақида ҳикоя қилган эдик. Яъни, жорий йил 24 мартга ўтар кечаси Алиакбар хорижда ўзи ижарага олган уйда рўй берган ёнғиндан ваҳимага тушмай, тез фурсатда қўшниларни огоҳ этиб уларни ёнғин гирдобидан халос этишда холис хизмати билан кўзга тушди. Унинг мардлиги шарофати билан  10 киши муқаррар ўлимдан  сақлаб қолинди.  

Жанубий Корея давлати ҳукумати Алиакбар Йўлдошевнинг мардлигини муносиб баҳолаб, унга ушбу мамлакатга истаган вақтида келиб, истаганча яшаш ва меҳнат қилиш ҳуқуқини таъминловчи ҳужжат билан тақдирлашди. У 2017 йилдан буён Жанубий Кореяда норасмий тарзда яшаб, ҳалол меҳнат билан машғул эди. Ушбу давлат Соғликни сақлаш ҳамда ижтимоий таъминот вазирлиги тантанали равишда Алиакбарга ажойиб туҳфани топширишди. Биз ҳам қаҳрамонни қутлаб, Туркистон вилояти маркази Туркистон шаҳри шарафини хорижда меҳнати ва жасорати билан улуғлаётган Алиакбарга омадлар тилаймиз.