ҚР Президенти Маъмуриятининг розилиги ва Туркистон вилоят ҳокимининг қарори билан Туркистон вилояти ҳокимининг биринчи ўринбосари бўлиб Арман Шарипбайули Жетписбай тайинланди.

Арман Жетписбай 1971 йили Жамбил вилояти, Жамбил тумани, Куйбишев қишлоғида туғилган. Олий маълумотли.

1993 йили Қозоқ кимё-технология институтини муҳандис-қурувчи ихтисослиги, 2002 йилда эса Т. Рисқулов номидаги Қозоқ иқтисод университетини иқтисодчи ихтисослиги бўйича тамомлаган.

Меҳнат фаолиятини 1992 йилда тижорат корхоналарида бошлаган.

Турли йилларда “Алаутрансгаз”, “Шимкентгаз” каби корхоналарда директор, “Казкоммерцбанк” ҲЖ Шимкент филиали директорининг ўринбосари, ушбу банкнинг Қизилўрда филиали директори, “Казкоммерцбанк Қирғизистон” ҲЖ бошқарма раисининг биринчи ўринбосари лавозимларида ишлаган. 

2003-2018 йилларда “ARNA Корпорацияси” ҲЖнинг бошқарма раиси, “Оңтүстік” Махсус иқтисодий минтақа дирекцияси ДК директори, Жанубий Қозоғистон вилоят ҳокимининг ўринбосари, Шимкент шаҳрининг ҳокими, “ARNA Petroleum” МЧБ танлов кенгаши раиси, “Қазатомөнеркәсіп” ҲЖнинг бошқарувчи директори, “Samruk-Kazyna Construction” ҲЖ бошқарма раиси сифатида фаолият юритган.

 2018 йилдан то бугунги кунга қадар  “Samruk-Kazyna Construction” ҲЖ бошқарма раисининг биринчи ўринбосари, “Объектлар қурилишини юритадиган компания” КЖ бош директори бўлиб ишлаган.