ҚР Соғликни сақлаш вазири ўринбосари Ажар Ғиният Туркистон вилоятига хизмат сафари билан келиб, минтақадаги аҳвол билан танишди. У ҳоким ўринбосари С. Қалқаманов билан бирга аҳолига хизмат кўрсатаётган бир неча тиббий даргоҳни оралаб, шифокорлар билан суҳбатлашди.

Вазир ўринбосари даставвал Ўрдабоши туманидаги марказий касалхонага борди. Даволаш маскани 120 минг кишига хизмат кўрсатади. Туманда коронавирус инфекциясини юқтирган 158 бемор рўйхатга олинган. Қувонарлиси, бугунги кунда инфекция билан хасталанган беморлар йўқ, дори-дармон жамғармаси етарли. 17та тезкор тиббий гуруҳ 1 мингдан зиёд кишининг уйларига бориб хизмат кўрсатади.

Ажар Ғиният сўнг Туркистон вилоятининг 3-сонли перинатал маркази ва шаҳар касалхонаси фаолияти билан танишди. Вилоят туғруқхонаси Туркистон, Кентов шаҳарлари ҳамда Сўзоқ ва Ўтрор туманларининг 450 минг аҳолисига хизмат кўрсатади. Марказда ҳомиладор аёлларга ихтисослаштирилган тиббий ёрдам ва ташҳис хизмати кўрсатилади.

Вилоятдаги умумий аҳволга тўхтасак, бугунги кунда даволаш масканларида ва провизор ўринлар сони 2 баравар қисқарди.

– Мазкур вирус ҳеч қаерга кетгани йўқ. Хасталикни авж олдирмаслик учун барча хавфсизлик чораларини назорат қилишимиз даркор. Инфекция билан кураш нафақат тиббий ходимлар балки ҳар бир фуқаро учун масъулиятли вазифа. Шу боис аҳоли ўртасида тушунтириш ишларини кўпроқ олиб бориш шарт. Бу борада вилоят ҳокимлиги ходимлари томонидан ҳам ёрдам кўрсатилмоқда. Минтақадаги тиббиёт ташкилотларининг инфекцияга қарши курашга тайёргарлиги юксаклигини илғаш мумкин, – деди А. Ғиният.