Вилоят ҳокими Ўмирзақ Шўкеев Мақтаарал туманига навбатдаги хизмат сафари билан бориб, барпо этилаётган уй-жойлар қурилиши ҳамда ободонлаштиришнинг бориши билан танишди.

Қурилиш майдонига айланган қатор қишлоқларда бунёдкорлик ишлари бир зум ҳам тўхтагани йўқ. Минтақа раҳбари Ўргебас ва Фирдавсий қишлоқларидаги бинокорлик иншоотларини оралаб, уларнинг сифатига жиддий эътибор қаратди ҳамда аҳоли билан учрашди. 

Мулоқот чоғида Ўмирзақ Естайули табиий офатдан зарар кўрган фуқароларнинг  саволларига батафсил жавоб берди. 

Аввал хабар қилганимиздек, Сардоба сув омборидаги ёрилиш натижасида 4000га яқин одам жабрланиб, 500дан зиёд уй бутунлай вайрон бўлди ва уларнинг қурилиши бошланган эди. Мирзакент қишлоғида Женис, Жанатурмис ва Дўстлик овуллари аҳолиси учун янги мавзе барпо этилмоқда.

Таъкидлаш жоизки, ушбу овуллардаги табиий офатдан жабрланган ҳар бир оилага 17 млн. тенгедан товон пули тўланди. 

Бугунги кунда янги мавзедаги 200та уй қурилиши тўлиқ якунига етди. Шунингдек, Фирдавсий қишлоғида 53та ва Ўргебас қишлоғида 39та уй фойдаланишга топшириш арафасида. 

Қишлоқлардаги бунёдкорлик ишлари минтақа раҳбарининг бевосита назоратида.