ҚР Соғликни сақлаш вазири Алексей Цой Туркистон вилоятига махсус хизмат сафари билан келди. Қозоғистоннинг Бош шифокори дастлаб Туркистон шаҳрида қурилаётган 630 ўринли кўпсоҳали вилоят касалхонасининг қурилиш майдонига борди. Янги касалхонада 16та жарроҳлик хонаси, 13та режали ҳамда 3та шошилинч тиббий ёрдам кўрсатиш бўлимлари мавжуд. Муассаса ишга туширилгач, бу ерда 1500дан зиёд тиббиёт ходими меҳнат қилади. Касалхона 2022 йилда фойдаланишга топширилади.

 Шунингдек, вазир ижтимоий соғликни сақлаш бошқармаси раҳбари Марат Пашимов билан шаҳардаги қатор тиббиёт муассасаларига бориб, тиббиёт ходимлари билан учрашди. Минтақадаги даволаш муассасалариниг фаолиятига ижобий баҳо берди.

– ҚР Президенти Мактубида дастлабки тиббий ёрдамни ривожлантиришга катта эътибор қаратди. Туркистон вилоятида ушбу йўналишда кўламдор ишлар амалга оширилмоқда. Туркистон шаҳар шифохонаси ходимларининг коронавирус инфекциясининг иккинчи тўлқинига тайёргарлиги юқори даражада эканлигига гувоҳ бўлдик. Барча тиббиёт ташкилотлари зарур воситалар ҳамда тез ёрдам машиналари билан таъминланган, – деди Алексей Цой.

Вазир ўз сўзида, вилоятда тумовга қарши эмлашга тайёргарлик тадбирлари жадал олиб борилаётганини таъкидлади. Минтақага ушбу мақсадда вакцинанинг биринчи партияси етказилган. Шу ойнинг 15-санасидан бошлаб эмлаш тадбири бошланади.

Соғликни сақлаш вазири сафар якунида Туркистон шаҳрида барпо этилаётган модулли юқумли касалликлар касалхонасига ҳам борди. Даволаш маскани 200 тўшак-ўринга мўлжалланган. Иншоотнинг қурилиши режалаштирилган ҳудудда барча керакли муҳандислик тизимлари ва транспорт инфратузилмаси мавжуд.