Вилоятимизга иш сафари билан келган Қозоғистон Республикаси Меҳнат ва аҳолини ижтимоий ҳимоялаш вазирининг ўринбосари Биржан Нуримбетов “Натижали иш билан таминлаш ва оммавий тадбиркорликни ривожлантириш” дастурини амалга ошириш, кутилаётган нафақа ва ёрдам пулларини кўпайтириш ҳамда манзилли ижтимоий ёрдам кўрсатишнинг янги усулини татбиқ этиш масалаларига бағишланган семинар-кенгаш ўтказди. Унда шаҳар ва туман ҳокимлари, бандлик ва ижтимоий дастурларни мувофиқлаштириш бошқармалари, иш билан таъминлаш марказлари вакиллари, нодавлат ташкилотларининг раҳбарлари иштирок этишди.
Вазир ўринбосари ўз маърузасида 2017 йилнинг 1 январидан бошлаб мамлакатимизда талабга эга касблар ва тадбиркорлик асосларига ёппасига ўқитиш, ишбилармонлик сирларини ўргатиш, насиялаштириш орқали оммавий тадбиркорликка шароит яратиш, ишга жойлашишда ёрдамлашиш, ишга сафарбар этишни қўллаш орқали меҳнат бозорини ривожлантириш кўзланганини “Натижали иш билан таъминлаш ва оммавий тадбиркорликни ривожлантириш” дастурини амалга ошириш бошланганини эслатди.
Дастурнинг дастлабки йўналиши доирасида 2,5 йиллик ўқиш муддатида коллежлар ҳамкорлигида бепул касбий-техник таълим уюштирилиб, унда, асосан мактабни тугатиб, ўқишга киролмаганларга эътибор қаратилади. Жорий йилда унга 21 мингдан зиёд қозоғистонлик ёшларни жалб этиш режалаштирилган.
– Давлат ўқиш харажатларини тўлиқ қоплаб, стипендия тўлайди. Йўл ва яшаш харажати ҳам қопланади, техник ва касбий таълим даргоҳларида ўқийдиганларга бир марта овқат берилади, – деди Б. Нуримбетов.
Шунингдек, коллежлар, “Атамекен” МТП ва корхоналарнинг ўқув марказлари доирасида касбий ўқитишга мўлжалланган қисқа муддатли курслар ўтказилади (1 ойдан 6 ойгача).
Чекка овулларда яшайдиган фуқароларнинг дарсларда иштирок этиши учун, сайёр ўқув марказлари ташкил этилади: Ақмўла, Ақтўбе, Шарқий Қозоғистон, Манғистов ва Қўстанай вилоятларида махсус дарсхоналарига эга кўчма мажмуалар уюштирилади.
– Шунга эътибор қаратиш керакки, агар илгари фақат иш берувчиларнинг аризалари орқали ўқитган бўлсак, эндиликда дарсларга тажрибали, ўз ишининг усталари жалб этилиб, талаб юқори касбларга ўқитамиз, – деди вазир ўринбосари.
Биржан Нуримбетов дастур иштирокчиларига, шаҳар жойларда “Даму” жамғармаси орқали, қишлоқ ва кичик шаҳарларда қишлоқ хўжалигини молиявий қўллаб-қувватлаш жамғармаси ва аграр корпорация орқали кредит берилишини маълум қилди. Насия миқдори 8 минг ойлик кўрсаткичигача кўпайган (18 млн. тенгегача) ва муддати 5 йилгача (чорвачилик ва қишлоқ хўжалиги ширкатларига 7 йилгача) узайтирилган. Йиллик устамаси – 6 фоиз атрофида. Шунингдек, аграр насия корпорацияси томонидан насияларни кафолатлаш услуби татбиқ этилган: тадбиркорлик ишини энди бошлаганларга 85 фоиз, касбий иш юритаётганларга 50 фоиз атрофида.
Дастурнинг учинчи йўналишида хусусий шахсларни ишга жойлаштиришда қўлловни кучайтириш, меҳнат захиралари сафарбарлигини юксалтириш ва меҳнат бозорининг инфратузилмасини ривожлантириш мақсад қилинган.
– Биз, ёшлар амалиёти, ижтимоий иш ўринлари ва жамоат ишлари сингари ёшлар ва аёллар ҳамда имконияти чекланган одамлар орасида талабга эга воситалардан фойдаланишни давом эттирамиз. Меҳнат захиралари сафарбарлигини орттириш мақсадида, ҚР Ҳукумати белгилаган ҳудудларга ўз хоҳиши бўйича кўчадиган фуқаролар давлат томонидан қўллаб-қувватланаверади. Яъни, уларга йўл ва юк харажатлари ҳамда кўчиб борган жойга мослашиш учун пул берилади. Бу йил лойиҳада 2,7 минг фуқарони қамраб олиш кутилмоқда.
Мазкур йилда дастурни амалга оширишга бюджетдан 85,3 млрд. тенге ажратилса, шундан 12,1 млрд. тенгеси Жанубий Қозоғистон вилоятига тегишли. Минтақада бандлик масалаларини ҳал этиш доирасида 21,1 минг киши дастурга тортилади.
– Ишсиз ва ўзини самарасиз иш билан таъминлаган фуқароларга алоҳида кўнгил бўлинади. Бизнинг вазирлик қишлоқ жойларда яшайдиган, ана шу тоифага кирадиган фуқароларнинг рўйхатини ишлаб чиқди. Уни ҳудудларга жўнатдик. Маҳаллий ҳокимликлар рўйхатни пухталаштириши керак, – деди Б. Нуримбетов.
Семинар-кенгашдан сўнг, вазир ўринбосари Шимкент шаҳридаги аҳолига хизмат кўрсатиш ва бандлик марказларида бўлди.
Манзилимиз:
16000, Шимкент шаҳри, Диваев кўчаси, 4-уй, 4-қават.
Газета ҚР Маданият ва ахборот вазирлиги томонидан 2010й.26майда рўйхатга олиниб.10957-Г гувоҳнома берилган. Муассис--Туркистон вилояти хокимлиги.
Ношир--"Жанубий Қозоғистон"вилоят ижтимоий-сиёсий газетаси таҳририяти масъулияти чекланган биродарлиги.