Шимкент ҳокими  қўл остидаги ходимлардан аҳоли билан ишлашни жонлантиришни талаб қилди. Ҳокимликда ўтган йиғилишда шаҳар раҳбари Ғабидулла Абдирахимов тўртта туман раҳбарлари ва бўлим бошлиқларига давлат хизматчилари олдидаги икки муҳим вазифани эслатди. Булар – аҳоли фаровонлигини ошириш ва талаб-истакларини қаноатлантириш борасидаги тадбирлар. Йиғилишда шаҳардаги ҳар бир туман ҳокими ўзларига маҳаллий аҳолидан қанча ариза ва шикоят тушгани, шаҳарликларни қандай масалалар ташвишлантираётгани ва муҳими, улар қандай ҳал қилинаётгани ҳақида маълумот беришди. 

Эслатиб ўтсак, 2016 йили Шимкентдаги Абай, Енбекши, Қоратов ва Ал Форобий туманлари ҳокимлари ҳисобот учрашувларини ўтказишганди. Унда Абай тумани ҳокимлигига 58 ариза тушиб, 34таси мажлис давомида ҳал этилган, 24 масала бўйича иш режаси тузилган.

Ал Форобий тумани ҳоки­мининг аҳоли билан учрашувида эса 69 савол тушган. Ундан 15таси шу ернинг ўзида ҳал қилиниб, иккитаси Абай тумани ҳокимлиги девонига юборилган. Қолган 52та масала бўйича иш режаси тузилган.

Енбекши тумани ҳокимига 47та ариза тушган. Шундан 27тасига учрашув давомида жавоб берилиб, қолган 20таси талаб-истак қонун билан тас­диқланган вақтда – қўйилган кундан бошлаб 10 кундан ошмайдиган вақт ичида ҳал этилган. Ўзига келиб тушган саволлар бўйича Қоратов тумани ҳокими ҳам маъруза қилди.

Йиғилиш сўнгида шаҳар раҳбари масъул ходимларга ишга муносабатни қайтадан кўриб чиқиб, аҳоли билан жипс алоқа ўрнатишни топширди.

– Ҳақиқий ҳоким ҳудудни оралаб, аҳоли билан та­ни­шиб, қандай муаммолар мав­жудлигини билишга ярим кунини бағишлаши шарт. Кун­нинг ик­кинчи ярмида ўз ҳокимлигида бўлим раҳбарлари билан уч­рашиб, шу муаммоларни ҳал этиш йўлларини муҳокама қилиши керак. Фуқароларнинг арзларига тўхталсак, сизлар уларнинг мурожаатлари қандай ўрганилаётгани ҳамда ҳал этилиши қай даражада эканидан хабардор қилиб туришларингиз керак. 

Ўзаро алоқа деганимиз – шу. Бу нарса сизларда ҳозирча йўқ. Бизнинг бош вази­фа­миз – халқнинг турмуш ша­роитини яхшилаш ва талаб-истакларини қаноатлантириш бўйича ишлашдир. Бизнинг йўл қуриш, коммунал хизмат кўрсатиш, транспорт маса­ла­ларини ҳал этиш каби стра­тегик режаларимиз – аҳоли фаровонлигини яхшилаш йў­лидаги топшириқлардир. Шу икки масала ўта муҳим, – деб йиғилишга якун ясади шаҳар ҳокими.