2020 йил январь-июль ойларида авиакомпаниялар Қозоғистонда 2,6 миллион йўловчи ташишди. Бу ўтгапн йилга нисбатан 43,1 фоизга кам.

Қозоғистон Индустрия ва инфратузилмаларни ривожлантириш вазирлиги Фуқаро авиацияси қўмитаси маълумотларига кўра йўловчилар айланмаси 4,3 миллиард чақиримни ташкил этди, бу эса ўтган йилга нисбатан 2,2 баравар кам.

Идоралараро комиссиянинг 2020 йил 11 августдаги қарорига биноан 17 августдан бошлаб Қозоғистон босқичма-босқич 6 та йўналиш бўйича 4 та давлатга халқаро парвозларни тиклади. Улар: БАА (11 рейс), Германия (5 та рейс), Беларусь (4 та рейс), ва Украина (3 та рейс). Июль ойида ўтган йилнинг июль ойига нисбатан йўловчи ташувчи авиакомпаниялар хизматлари нархи 19 фоизга пасайган.

Хизматлар нархлари Шимкентда (51,3 фоиз), пойтахтда (46,4 фоиз) ва Ақтўбе вилоятида (37,2 фоиз) арзонлашди. Тўртта ҳудудда: Ақмўла, Алмати, Шимолий Қозоғистон ва Туркистон вилоятларида нархлар ўзгаришсиз қолди. Шунингдек, чипта нархи Атирау вилоятида 18,5 фоиз, Қўстанай вилоятида 4,3 фоиз қимматлашган.