Сайрам туманида 2 қаватли уйнинг тўкис таъмирлаш ишлари якунланди. Пудратчи ташкилот бажарган ишлар натижаси билан вилоят ҳокимининг муовини С. Қалқаманов танишди. Ақсу қишлоғидаги ушбу уй навбатда турган 17 нафар ота-она ғамхўрлигисиз қолган, етим болаларга берилади. Бинони тўкис таъмирдан ўтказиш учун бюджетдан 68 млн. тенге ажратилди.
Таъкидлаш жоизки, Сайрам туманида давлат уй-жойига муҳтож 184 нафар ота-она ғамхўрлигисиз қолган, етим бола рўйхатга олинган.

Шунингдек туманда давлат-хусусий ҳамкорлиги доирасида 1200 ўринли янги мактаб очилди. Таълим маскани ҳудудида 5та спорт зали, теннис майдончаси, футбол майдони, турли тўгараклар учун махсус хоналар, бассейн мавжуд. Биология, химия ва физика фанлари кабинетларига зарур ускуна ва 74та интерфаол тахта ўрнатилган.
Мактабда икки сменада 2400 ўқувчи таҳсил олиш имкониятига эга.
Ҳозир бу мактабда 1-2 синф ўқувчилари карантин талабларига риоя қилган ҳолда ўқишмоқда.
Таъкидлаш жоизки, ушбу таълим муассасаини қурган сармоядор муқаддам 7та болалар боғчаси ва 2та мактаб барпо этган.