Вилоят ҳокими Ўмирзақ Шўкеев Туркистон шаҳридаги қурилиш иншоотларида бўлиб, ободонлаштириш ҳамда кўкаламзорлаштириш ишларини кўздан кечирди.

Минтақа раҳбари дастлаб Нурсултан майдони ҳамда унинг қошидаги хиёбонга борди. Бугунги кунда иншоотнинг қурилиш-монтаж ишлари амалдаги жадвал асосида олиб борилмоқда. Унинг ҳудудида пиёдалар учун йўлаклар ва фаввораларни бетонлаш ишлари якунланган.

Минтақа раҳбари Тўнғич Президент истироҳат боғи ва “Ҳазрат султон” қўриқхона-музейи атрофини ободонлаштириш ишларини назорат қилиб, кўп тармоқли истироҳат боғини бориб кўрди.

Элбоши боғида иш қизғин. Шу ойда 295 туп дарахт ҳамда 6500 дона бута ўтқазиш кўзда тутилган.

“Ҳазрат султон” қўриқхона-музейининг ҳудудини ободонлаштириш ишлари 4 босқичда олиб борилади. Музей ҳудудида ер текисланиб, сув ҳамда оқова тизими тўлиқ битказилди. Фаввора майдони бетонланди. Кўкаламзорлаштирилган ҳудудга суғориш тизимини ўрнатиш ишлари 60 фоизга бажарилди.

Шунингдек, кўп тармоқли истироҳат боғида ободонлаштириш ишлари поёнига етмоқда. “Конгресс холл”, ўйингоҳ, Ўқувчилар саройи, драма театри, “Rixos Turkestan” меҳмонхонаси, “Буюк Дашт эли” илмий-оммабоп кутубхонасининг қурилиш жадал олиб борилмоқда. 

Ўмирзақ Естайули ишчилар ва мутасаддилар билан мулоқотда бўлиб, иш суръатини кучайтиришни топширди.