ҚР Президенти Бош вазирга мамлакатдаги эпидемиологик ҳолатни қатъий назоратга олишни топширди

Давлат раҳбари Қасим-Жўмарт Тўқаев Бош вазир Асқар Маминни қабул қилди. Қозоғистон Президентига жорий йилнинг 9 ойи давомидаги ижтимоий-иқтисодий тараққиёт тўғрисида маълумот берилди. Шунингдек, қатор соҳаларда ижобий тенденция борлиги айтилди. 

Хусусан, қайта ишлаш саноатининг ўсиши 3,3 фоизга етди, қурилиш ҳажми 10,5 фоизга ўсди, уйларнинг фойдаланишга топширилиши 9 фоизга ёки тахминан 9,6 миллион квадрат метрга ошди. Қишлоқ хўжалигида ўсиш суръати 5 фоизни ташкил қилди. Қозоғистон Олтин-валюта жамғармаси ва Миллий жамғарма активлари 1 октябрь маълумотларига кўра, 91,1 миллиард долларни ташкил этди. Бош вазирнинг сўзларига кўра, хизмат кўрсатиш соҳасидаги фаолиятни қайта тиклаш сентябрдан бошланган. 

Бош вазир 11-12 октябрь кунлари Абу-Дабига хизмат сафари натижалари тўғрисида ҳисобот берди. Ташриф давомида Давлат раҳбари Қасим-Жўмарт Тўқаевнинг жорий йил январь ойида Бирлашган Араб Амирликларига расмий ташрифи чоғида эришилган келишувлар амалга оширилаётгани таъкидланди. Икки ҳукумат сармоявий ҳамкорлик бўйича меморандум имзоладилар. У қиймати 6,1 миллиард долларга тенг 21та лойиҳани амалга оширишни назарда тутади. Давлат раҳбари Ҳукуматнинг иқтисодий тараққиётнинг ижобий суръатларини таъминлашга қаратилган саъй-ҳаракатларини таъкидлади, фуқароларимизнинг соғлиги, кичик ва ўрта бизнес фаолияти, шунингдек, хорижий мамлакатларда кенг тарқалган коронавирус эпидемияси салбий таъсирининг олдини олиш мақсадида мамлакатдаги эпидемиологик вазиятни қатъий назоратга олишни топширди.