Президент Қасим-Жўмарт Тўқаев Семей шаҳрига ташрифи чоғида «Буюк шоир Абай ўғиллари билан» ёдгорлигининг очилиш маросимида иштирок этди ва «Жидели-Бўрли» давлат тарихий-маданий ва адабий-мемориал қўриқхона-музейига борди. Давлат раҳбари Абайнинг нодир нашрлари кўргазмаси билан танишиб, «Абай олами» туркумида нашр этилган китоблар тақдимотида иштирок этди ҳамда абайшунослар билан учрашди.

Ташриф якунида Қасим-Жўмарт Тўқаев Жидебай овулига бориб, «Абай-Шакарим» ёдгорлик мажмуаси ва шоирнинг музей-уйи фаолияти билан танишди.

– Мен буюк шоир руҳига ҳурмат бажо келтириш учун ушбу муқаддас заминга келдим, – деди Президент ёдгорликнинг очилиш маросимида. – Буюк Абай нафақат мамлакатимиз фахри, балки жаҳон даражасидаги даҳо, халқимиз қалбидан чуқур жой олган буюк шоирдир. Абай янги адабиётимизнинг асосчиси сифатида мамлакат тарихида алоҳида из қолдирди. Унинг асарлари бир асрдан кўпроқ вақт ўтса ҳам, аҳамиятини йўқотмади. Шу боис, ҳаммамиз учун маънавий озуқа бўлиб қолаверади. Шоирнинг ибратли ҳаёти ва бой мероси халқимиз ва бутун дунё хазинасидир. Буюк мутафаккир ёшларни пухта билим ва илм олишга, ҳунар ва тил ўрганишга, касб ўрганишга даъват этган. Биз Абайнинг ишончига содиқ қолишимиз керак. “Масъул давлат – масъул жамият – масъул шахс” тизимининг мустаҳкам ўрнатилиши шунга боғлиқ. Ушбу ёдгорлик ёш авлодни руҳлантириши керак. Унинг сўзлари ва ишларини бир-бирига боғлаб турган Абай ва унинг доно ўғиллари Ақилбай ва Тўрақуллар ёш авлод учун ўрнак бўлдилар.

Президент юртимизда Абайнинг 175 йиллигини нишонлашга алоҳида эътибор қаратилганини таъкидлади. 

– Миллий ва халқаро миқёсда кенг кўламли тадбирларни ўтказдик. Шоир меросини тарғиб қилиш, сўзларини ёш авлод онгига сингдиришга эътибор қаратдик. Буюк мутафаккир мероси мамлакатимизнинг равнақи учун замин яратадиган бебаҳо бойликдир, – деди Давлат раҳбари.