Минтақадаги тадбиркорлар таълим муассасаларини ишончли бошқарувга олишмоқчи. Бу масала вилоят ҳокими муовини С. Қалқаманов ва вилоят таълим бошқармаси раҳбарлари иштирокида ўтган Минтақавий кенгаш қошидаги таълимни ривожлантириш қўмитасининг кенгайтирилган мажлисида муҳокама қилинди. 

Маърузачилар вилоятда 66та техник ва касбий билим юрти фаолият юритаётган бўлса, улардан 35таси давлат тасарруфида, 31таси хусусийлаштирилганини маълум қилишди. 

– Туркистон вилояти «Атамекен» тадбиркорлар палатасига 10та йирик корхона раҳабарлари мурожаат қилиб, техник ва касбий билим юртларини ишончли бошқарувга сўрашмоқда. Лекин бизнес соҳасига мутахассисларни тайёрлайдиган 6та билим юрти «Жас маман» лойиҳасига киритилган ва давлат томонидан молиялаштирилиб, замонавийлаштирилмоқда. Демак, уларни  хусусийлаштириш мумкин эмас, – деди вилоят тадбиркорлар палатаси директори Тимур Нахипбеков. – Хусусий мулкдор қуйидаги мажбуриятларни бўйнига олади: болалар учун бепул таълим бериш, биноларни таъмирлаш, моддий-техник базани мустаҳкамлаш.

Ушбу масалани ижобий ҳал қилиш мақсадида ҳокимлик ва «Атамекен» тадбиркорлар палатаси ҚР Фан ва таълим вазирлигига таклиф йўллашди.