Туркистон вилоятининг жанубидаги Сариоғоч, Келес, Жетисай, Мақтаарал, Чордара туманларини сув, газ билан таъминлаш ҳамда янги таълим муассасаларини барпо этиш учун келгуси йилда 10та лойиҳа амалга оширилади. Бунинг учун республика бюджетидан 16 млрд. тенге ажратилади. Буни ушбу минтақада амалга оширилаётган кўламдор ишларни кўздан кечирган вилоят ҳокими Ўмирзақ Шўкеев маълум қилди.

– Туркистон вилоятининг жанубий ҳудудларини ривожлантиришга ижобий жўшқинлик берадиган 67та лойиҳани тасдиқладик. Унинг 10тасини Ҳукумат тасдиқлаб, зарур маблағ ажратади. Чунончи, вилоят бюджетидан ҳам 40 млрд. тенге ажратилиб, 57та лойиҳа амалга оширилади. Шунингдек, маблағнинг 30 млрд.тенгеси жорий йилда ажратилса, 10 млрд. тенгеси келгуси йилда ушбу лойиҳаларни якунига етказиш учун ажратилади, – деди минтақа раҳбари.

Истиқболли лойиҳалар – ижтимоий инфратузилмалар, қишлоқларда мактаб, касалхона қуриш, йўл ётқизиш, газ қувурларини қўшиш ишларини амалга оширишга йўналтирилади. Жанубий минтақада жойлашган Чордара, Келес, Жетисай, Мақтаарал, Сариоғоч туманларида яшайдиган аҳолини 2020-2021 йилларда газ, сув, электр энергияси билан тўлиқ таъминлаш юзасидан вилоят ҳокимлиги томонидан Ҳукуматга тавсия этилиб, 16 млрд. тенге маблағ ажратилади.

Ўтган йили вилоят тараққиётининг мажмуавий лойиҳаси тайёрланганда аҳоли сони 1 миллионга яқин жанубий ҳудудлар ижтимоий инфратузилмасини ривожлантиришга асосий устуворлик берилган эди. Жорий йилда эса лойиҳа доирасида йўл, уй-жой-коммунал хўжалик соҳаси ва ижтимоий иншоотлар қад кўтармоқда.