ҚР Бош вазири Асқар Мамин Қарағанди фармацевтика мажмуасига ташриф буюриб, «Спутник V» вакцинасини ишлаб чиқариш конвейерини ишга туширди, дея хабар беради ҚР Бош вазирининг матбуот хизмати.

Бу корхонада ҚР Президенти Қасим-Жўмарт Тўқаев ва Россия Президенти Владимир Путин ўртасидаги келишувларни амалга ошириш доирасида мажмуавий асосда босқичма-босқич 2 миллион  доза вакцина ишлаб чиқарилади.

– Қозоғистонда ишлаб чиқарилган «Спутник V» оммавий вакцинаси билан эмлаш 2021 йил февралда бошланади. Даставвал, у билан  ихтиёрий равишда тиббиёт ходимлари, ўқитувчилар, талабалар, ҳуқуқни муҳофаза қилиш органлари ходимлари, тиббий-ижтимоий муассасалар жамоалари, шунингдек, сурункали касалликларга чалинган юқори хавфли гуруҳ вакиллари эмланади, –  деди А. Мамин.

Соғликни сақлаш вазирлиги  маълумотларига кўра, коронавирусга қарши вакцина билан  65 ёшдан ошганлар, юрак-қон томир касалликлари, диабет ва сурункали ўпка касалликлари билан касалланганлар,  хавфли гуруҳдагилар ва тиббиёт ходимларини эмлаш режаланмоқда.

Вакцина билан эмланадиганларнинг тахминий сони 2 347 000 киши.