2020-2021 ўқув йилининг III чорагида ўқувчилар, ўқитувчилар ва бошқа ходимларнинг соғлигини сақлаш мақсадида мактабларда таълим масофадан  ташкил қилинади. Битирувчи синф ўқувчилари санитария қоидаларига риоя қилган ҳолда мактабга қатнаб ўқишади. Бу ҳақда вилоят инсон салоҳиятини ривожлантириш бошқармаси раҳбари Ардақ Мадихан қизи маълум қилди.

9-11- синфларда ўқийдиган вилоятдаги 66401 нафар ўқувчи асосий фанларнинг 70 фоизини (математика, тиллар, физика, химия, тарих, география, биология, жисмоний тарбия) мактабда, 30 фоизини (информатика, ҳуқуқшунослик, ўзини ўзи таниш, меҳнат) эса масофадан ўқийди. Бундан ташқари, мактаб маъмуриятининг қарорига кўра, дарсдан ташқари вақтда 5 ўқувчидан кўп бўлмаган гуруҳларда ўқувчиларга таълим берилади. 

–Вилоятимиздаги 918та мактабда 24317та компьютер  ҳолати қониқарли. Ўқувчиларнинг умумий сони – 499975 нафар. Мактаблардаги компьютер тақчиллигини бартараф қилиш учун Қозоғистон Республикаси Ҳукумати захираси ҳисобидан 57190та (7711та планшет, 5952та компьютер, 43527та ноутбук) компьютер воситалари харид қилинди, – деди у.

Умуман олганда, минтақадаги ўқувчиларга 24317та компьютер мактаб жамғармасидан, 1539та компьютер воситаси маҳаллий бюджетдан, 1445та компьютер эса “Мактабга йўл” акцияси доирасида ҳомийлар томонидан берилган. Ноутбуклар ва компьютерлар туман, шаҳар таълим бўлимларига юборилган.

Таъкидлаш жоизки, таълим муассасаларида маблағ етишмовчилигини ижобий ҳал этиш масаласи муҳокама қилинмоқда. Жорий йилда  зарур маблағ ажратилади. Бундай муаммолар Кентов шаҳри, Сайрам, Сариоғоч ва Келес туманларида мавжуд.