«Жанубий Қозоғистон» газетасида икки марта (2004-2006 ва 2015-2016 йиллар) бош муҳаррир бўлиб фаолият юритган Фахриддин Қоратоевга яна Мажлис депутати бўлиш бахти насиб этди. У бу шарафли мансабга Nur Otan партияси номидан эришди.

Фахриддин Қоратоев 1963 йил 5 декабрда Жанубий Қозоғистон вилояти, Сайрам тумани, Оқсувобод қишлоғида туғилган. Жамбил енгил саноат технология институтини тугатган. Меҳнат фаолиятини чарм хомашё фабрикасида транспорт-саралаш цехи ходими бўлиб бошлаб, омбор ишчиси, таъминотчиси, цех раҳбари, бош муҳандис, Қорабулоқ қишлоқ округи ҳокими, Сайрам тумани ҳокими маслаҳатчиси, ҳоким ўринбосари, Nur Otan партияси раисининг биринчи ўринбосари лавозимларида ишлаган.

2016 йил 24 мартдан олтинчи чақириқ Қозоғистон Республикаси Парламенти Мажлисининг депутати.

Иккинчи бор Парламент депутати этиб сайланган ҳамюртимиз-ҳамкасбимиз Фахриддин Қоратоевни чин дилдан қутлаб, ишларига улкан зафарлар тилаб қоламиз.

Таҳририят. 

Nur Otan партияси номидан Парламент Мажлиси депутати бўлиш шарафи бу гал республикадан 76 одамга насиб этди.

 Улардан 36 нафари праймериз ғолиблари, 40 нафари сиёсий Кенгаш бюроси квотаси бўйича танланди. 

Депутатларнинг 26,3 фоизи ҳуқуқшунослар, 23,7 фоизи иқтисодчилар, 23,7 фоизи илмий даражага эга, 10,5 фоизи таълим ва соғликни сақлаш ходимлари, 9,2 фоизи давлат бошқаруви органлари вакиллари. 

Партия фракциясининг янги таркиби 40 фоизи хотин-қизлар ва 35 ёшгача бўлган ёшлардан иборат. Умуман олганда, Мажлисда марказий партиянинг таркиби 70 фоизга янгиланди.